သုံးနိုင်ငံခေတ်(၈၄)

အခန်း(၈၄) "လုရွှင့်"(Lu Xun) သည် တပ်စခန်းတို့ကို မီးရှို့ခြင်း။

"ကျူးကဲလျန့်"(Zhuge Liang) သည် ရှစ်ပေါက်ဝင်္ကပါကိုဖန်တီးခြင်း။

"လုရွှင့်"(Lu Xun) သည် ရန်သူတို့၏လှုပ်ရှားမှုကိုကြားသောအခါ အမြင့်တစ်ခုမှနေပြီးသွားကြည့်ရာ အသုံးဝင်ပုံမရသော ရှူတပ်သားတစ်သောင်းကိုမြင်ရလေသည်။ ထိုတပ်၏အလံတွင် ရှေ့ပြေးတပ်ခေါင်းဆောင် "ဟူပန်"(Hu Ban) ဆိုသောအမည်ကိုရေးထားသည်။ "ကျိုးထိုက်"(Zhou Tai) မှ

"သူတို့တွေက ကလေးသာသာပဲရှိတယ်၊ ကျွန်တော်နဲ့ စစ်သူကြီးဟန်တန်(Han Dang) ကိုတိုက်ခွင့်ပေးပါ။ သူတို့ကိုအနိုင်ယူဖို့အာမခံပါတယ်"

စစ်သေနာပတိက မည်သို့မျှပြောခြင်းမရှိပဲ ဆက်လက်ကြည့်ရှုနေခဲ့သည်။ ပြီးနောက်တွင်မှ

"အဲ့နားမှာ တိုက်ခိုက်လိုစိတ်အငွေ့အသက်တွေရှိနေတယ်။ အရှေ့မှာရှိနေတဲ့တပ်သားတွေက လာဟပ်ဖို့စောင့်နေတဲ့ငါးစာပဲ။ ဒါကြောင့် ထွက်ပြီးမတိုက်ပါနဲ့"

ထိုစကားကိုကြားသောအခါ သေနာပတိသည် အရည်အချင်းမရှိဟူ၍သာ မှတ်ယူကြသည်။

နောက်ရက်တွင် "ဟူပန်"(Hu Ban) ၏တပ်သားတို့သည် အနီးသို့ကပ်လာပြီး တိုက်ခိုက်ရန်စိန်ခေါ်သည်။ သူတို့သည် လက်နက်တို့ကိုဆော့ကစားနေခဲ့ပြီး သံချပ်ကာတို့ကိုချွတ်ကာ မထီမဲ့မြင်လုပ်ပြသည်။ အချို့မှာ ထိုင်နေပြီး အချို့မှာအိပ်နေသည်။ "ရွှီရှန်"(Xu Sheng) နှင့် "တင်းဖုန်း"(Ding Feng) တို့ရောက်လာပြီး

"အဲ့တပ်သားတွေက ကျွန်တော်တို့ကို တအားအထင်သေးလွန်းတယ်။ ကျွန်တော်တို့ကိုထွက်ပြီးတိုက်ခွင့်ပေးပါ"

"လုရွှင့်"(Lu Xun) မှ ပြုံးကာ

"ခင်ဗျားတို့က သာမန်သတ္တိရှိခြင်းဆိုတဲ့အမြင်ကပဲ ကြည့်တာကိုး။ ဆွန်ဇု(Sun Zi) နဲ့ ဝူချီ(Wu Qi) တို့ချမှတ်ခဲ့တဲ့စစ်ဗျူဟာတွေကိုမသိဘူးလား။ ဒါက ကျုပ်တို့ကိုသက်သက်တိုက်ခိုက်အောင် ရန်စတဲ့သဘောပဲ။ နောက်သုံးရက်လောက်ကျရင် သူတို့တွေဟန်ဆောင်နေတယ်ဆိုတာ သိပါလိမ့်မယ်"

"နောက်သုံးရက်ဆိုရင် ရန်သူတွေရဲ့ပြောင်းရွှေ့မှုပြီးဆုံးသွားမှာဖြစ်ပြီး ကျွန်တော်တို့အောင်နိုင်ဖို့အခွင့်အရေးရှိမှာမဟုတ်ဘူး"

"ကျုပ်က သူတို့စခန်းပြောင်းရွှေ့မှာကို စောင့်နေတာ"

"ရွှီရှန်"(Xu Sheng) နှင့် "တင်းဖုန်း"(Ding Feng) တို့သည် ရွက်ဖျင်တဲမှထွက်ကာ ထေ့ငေါ့လှောင်ပြောင်ခဲ့သည်။

တတိယနေ့တွင် "ဟူပန်"(Hu Ban) ဦးဆောင်သောတပ်မှာမရှိတော့သည်ကိုတွေ့မိကြသည်။ "လုရွှင့်"(Lu Xun) မှ လက်ညှိုးညွှန်ပြီး

"ဟိုတောင်ကြားနားကနေ ကြောက်မက်ဖွယ်ခံစားချက်ကိုရနေတယ်။ မကြာခင်မှာ လျူဘေ့(Liu Bei) ရောက်လာလိမ့်မယ်"

ထို့နောက် ပထမဧကရာဇ်သည် သူ၏တပ်မကြီးကိုဦးဆောင်ကာထွက်လာသည်ကိုမြင်သဖြင့် ဝူစစ်သူကြီးတို့မှာ လန့်သွားသည်။ "လုရွှင့်"(Lu Xun) မှ

"ဒါကြောင့် ခင်ဗျားတို့ ဝူပန်(Wu Ban) ကိုတိုက်မယ်ဆိုတာကို တားခဲ့တာပေါ့။ အခုကင်းပုန်းတွေမရှိတော့ဘူးဆိုတော့ နောက်ဆယ်ရက်အတွင်းမှာ သူတို့ကိုအနိုင်ယူနိုင်ပြီ"

"တကယ်တော့ ရန်သူတွေပြောင်းရွှေ့နေတဲ့အချိန်က တိုက်ဖို့အချိန်ကောင်းပဲမဟုတ်လား? အခုစခန်းတွေရွှေ့သွားပြီဆိုတော့ ရန်သူတွေက အခိုင်အမာနေရာယူထားပြီးပြီ။ သူတို့ကိုအနိုင်ယူဖို့ပိုမခက်သွားဘူးလား?"

"ခင်ဗျားတို့ဒီတိုက်ပွဲကိုဘယ်လိုရင်ဆိုင်ရမယ်ဆိုတာ နားလည်ပုံမပေါ်ဘူး။ လျူဘေ့(Liu Bei) က အရည်အချင်းရှိပြီး ပရိယာယ်ကြွယ်တဲ့လူပဲ။ သူစစတိုက်တဲ့အချိန်မှာ သူ့နည်းဟန်တွေက အကောင်းဆုံးဖြစ်ပြီး ထိန်းသိမ်းထားနိုင်တာကြောင့် သူ့ကိုထိပ်တိုက်မရင်ဆိုင်သင့်ဘူး။ အခု သူ့တပ်သားတွေက ပင်ပန်းနေပြီး သူ့အတွေးစိတ်ကူးတွေလည်း ကြည်လင်မနေတော့ဘူး။ ဒါဟာ ကျုပ်တို့တိုက်ဖို့အချိန်ကောင်းပဲ"

နောက်ဆုံးတွင် အကုန်လုံးက သူတို့ခေါင်းဆောင်ပြောသည်ကိုလက်ခံကြသည်။

"လုရွှင့်"(Lu Xun) သည် ရှူတပ်ကိုတိုက်ခိုက်ရန်ပြင်ဆင်ပြီး မည်သည့်အချိန်တွင် ရန်သူ့ကိုအနိုင်ယူနိုင်မည်ဖြစ်ကြောင်း ဝူမင်းသားထံသတင်းပို့ခဲ့သည်။ မင်းသားမှ

"ကျုပ်တို့ခေါင်းဆောင်ကောင်းရှာတွေ့သွားပြီ၊ ကျုပ်စိတ်ပူစရာမလိုတော့ဘူး။ အကုန်လုံးက သူ့ကိုအရည်အချင်းမရှိဘူးလို့ပြောကြပေမယ့် အဲ့လိုမဟုတ်ဘူးဆိုတာ ကျုပ်သိတယ်။ သူက စာအုပ်ကြီးအတိုင်းမလိုက်တဲ့လူဖြစ်တယ်"

ထို့နောက် အရံတပ်တို့ကိုအဆင်သင့်ပြင်ထားစေသည်။

ပထမဧကရာဇ်သည် ရေတပ်ကိုပါ ဝူပြည်၏ပိုင်နက်အတွင်းသို့ဝင်လာရန်အမိန့်ချခဲ့ရာ "ဟွမ်ချွမ်"(Huan Quan) က ကန့်ကွက်ခဲ့သည်။

"သင်္ဘောရေစုန်ကိုလာဖို့လွယ်ပေမယ့် အပြန်မှာဘယ်လိုလုပ်မလဲ? ကျွန်တော်အရင်ဆုံးသွားကြည့်ပြီးမှ အရှင်မင်းကြီးက လိုက်လာခဲ့သင့်ပါတယ်။ ဒီလိုဆို တစုံတခုမှားယွင်းမှာမစိုးရိမ်ရတော့ဘူး"

"ဝူတပ်တွေက ကြောက်ရွံ့နေကြပြီ။ ကျုပ်က သူတို့ကိုတိုက်တာ ဘာများခက်ခဲမတုန်း"

ကန့်ကွက်မှုတို့ကို ဧကရာဇ်သည် လက်မခံခဲ့ပဲ တပ်မကြီးကို နှစ်ခုခွဲလိုက်သည်။ တပ်မတစ်ခုကို "ဟွမ်ချွမ်"(Huang Quan) အားဦးဆောင်စေပြီး ရန်စီမြစ်၏မြောက်ဘက်တွင်ထားကာ ဝေပြည်၏အခြေအနေကိုစောင့်ကြည့်ထားစေသည်။ ကျန်တပ်တို့ကို ဧကရာဇ်ကိုယ်တိုင်ကွပ်ကဲပြီး ရန်စီမြစ်၏တောင်ပိုင်းတွင် နေရာချထားသည်။ သူတို့သည် မြစ်ကမ်းတစ်လျှောက် တပ်စခန်းများချထားလေသည်။

ထိုအကြောင်းကို ဝေပြည်သူလျှိုတို့မှ ဝေဧကရာဇ်ထံသတင်းပို့ခဲ့သည်။

"ရှူတပ်တွေက မိုင်နှစ်ရာအကွာအဝေးအတွင်း တောင်ကုန်းတွေနားမှာစခန်းလေးဆယ်ထားရှိပြီး တပ်စွဲထားကြတယ်။ ဒါ့အပြင် ရှူဧကရာဇ်က ဟွမ်ချွမ်(Huang Quan) ကို ရန်စီမြစ်ရဲ့မြောက်ဘက်မှာထားပြီး သူ့ရေတပ်တွေက နေ့တိုင်း မိုင်သုံးဆယ်လောက်ကို ကင်းလှည့်နေတယ်။ သူတို့တွေ ဘာလုပ်နေလည်းမသိဘူး"

ထိုအကြောင်းကိုကြားသောအခါ ဝေဧကရာဇ်သည် ရယ်မောခဲ့ပြီး

"လျူဘေ့(Liu Bei) စစ်ရှုံးတော့မယ်"

"ဧကရာဇ်က ဘယ်လိုသိရတာလဲ"

"ဘာလို့လည်းဆိုတော့ စစ်ဘယ်လိုတိုက်ရမယ်ဆိုတာ လျူဘေ့(Liu Bei) ကနားမလည်လို့ပဲ။ မိုင်နှစ်ရာအကွာမှာ စခန်းတွေချပြီး ရန်သူတွေကိုဘယ်လိုရင်ဆိုင်နိုင်မလဲ? စစ်ဗျူဟာဆိုရိုးတွေဟာ မြေပြန့်၊ စိမ့်တော၊ မတ်စောက်တဲ့နေရာတွေနဲ့ခလုတ်ကန်သင်းများတဲ့နေရာတွေမှာ တပ်စခန်းမချသင့်ဘူးလို့ဆိုကြတယ်။ သူ လုရွှင့်(Lu Xun) ရဲ့လက်ချက်နဲ့စစ်ရှုံးရတော့မယ်၊ ဒီသတင်းကို နောက်ဆယ်ရက်ကြာရင် ကြားရလိမ့်မယ်"

ထိုစကားကို အမှုထမ်းတို့မှာ သံသယရှိကြသည်။ ပြီးနောက် "ဟွမ်ချွမ်"(Huang Quan) ၏တပ်ဖွဲ့တို့ကိုဂရုပြုရန်နှင့် အခွင့်အရေးရပါက ရှူပြည်ကိုတိုက်ရန် တိုက်တွန်းကြသည်။

ဝေဧကရာဇ်မှ

"ကျုပ် ရှူပြည်ကိုမတိုက်သေးဘူး။ ဝူပြည်ကအနိုင်ရသွားရင် လုရွှင့်(Lu Xun) က ဝူတပ်ကိုဦးဆောင်ပြီး အနောက်ဘက်နယ်ကိုချီတက်မှာပဲ။ အဲ့အချိန်မှာ ကျုပ်က စစ်ကူပို့ချင်ယောင်ဆောင်ပြီး ဝူပြည်ကိုချေမှုန်းရမယ်"

အကုန်လုံးက အရိုအသေပြုကာ ထောက်ခံခဲ့ကြသည်။ ထို့နောက် "ချောင်ရန်"(Cao Ren) ကိုတပ်ဖွဲ့တို့နှင့်အတူ ရုရွှီသို့သွားစေပြီး ချောင်ရှို့(Cao Xiu) ကို တုံးခို၊ "ချောင်ကျန်း"(Cao Zhen) ကို နန်ကျွင်းတွင် အဆင်သင့်တပ်စွဲထားစေသည်။ ထိုတပ်တို့ကိုပူးပေါင်းပြီး ဝူပြည်ကိုတိုက်ခိုက်ရန်ပြင်ထား၏။ ထို့အပြင် ဝေဧကရာဇ်ကိုယ်တိုင်ကလည်း အကူတပ်နှင့်အတူ တောင်ပိုင်းကိုချီတက်မည်ဖြစ်သည်။

ချန်တူးကိုရောက်သည်နှင့် "မာလျန့်"(Ma Liang) သည် အချိန်မလင့်စေပဲ ကွင်းဆင်းကြည့်ရှုနေသော ဝန်ကြီးချုပ်ထံသွားသည်။

"အခုတပ်ဖွဲ့တွေက ရန်စီမြစ်တလျှောက်မိုင်နှစ်ရာရှည်လျားတဲ့နေရာ အရိပ်ရရာတောင်ကုန်းတွေ၊ တောအုပ်တွေနားမှာ တပ်စွဲထားပါတယ်။ ဧကရာဇ်ရဲ့အမိန့်နဲ့အတူ ဒီမြေပုံကိုယူလာပြီး ဝန်ကြီးချုပ်ရဲ့အကြံကိုလာတောင်းတာပါ"

"ကျူးကဲလျန့်"(Zhuge Liang) သည် သူ၏နံဘေးမှခုံကိုခေါက်ကာ

"ဘယ်သူက ဒီဗျူဟာကိုအကြံပေးတာလဲ? အဲ့လူကိုသေဒဏ်ပေးသင့်တယ်!"

"ဒါ ဧကရာဇ်ရဲ့အကြံပဲဖြစ်ပါတယ်၊ တခြားဘယ်သူမှမပါ,ပါဘူး"

"ကျူးကဲလျန့်"(Zhuge Liang) သည် ဝမ်းနည်းစွာဖြင့်

"ဟန်တိုင်းပြည်ရဲ့အသက်နဲ့ခွန်အားကို တကယ်ကိုပြီးဆုံးသွားခဲ့ပြီပဲ။ စစ်ဗျူဟာရဲ့နည်းလမ်းတွေမှာ လုံးဝရှောင်လွှဲရမယ့်အရာတွေကို ဧကရာဇ်ကကျူးလွန်ခဲ့တယ်။ စခန်းတွေကိုဒီလိုလုပ်ထားတော့ အလွယ်တကူမလှုပ်ရှားနိုင်ဘူး၊ အကယ်၍ ရန်သူသာမီးကိုအသုံးပြုပြီးတိုက်ရင်တော့ သွားပြီပဲ။ ဒါ့အပြင် ဒီလောက်မိုင်နှစ်ရာရှည်လျားတဲ့စခန်းတွေကိုဘယ်လိုကာကွယ်နိုင်မတုန်း? ဘေးဥပဒ်ကြီးကျရောက်တော့မယ်၊ ဒါကို လုရွှင့်(Lu Xun) ကလည်းသိနေပြီး အဲ့ဒါကြောင့် သူတို့က ထွက်ပြီးမတိုက်တာဖြစ်တယ်။ ခင်ဗျား အမြန်ဆုံးပြန်သွားပြီး ဧကရာဇ်ကို အဲ့လိုမလုပ်ဖို့၊ ချက်ချင်းပြောင်းလဲဖို့ သွားပြောပါ"

"ဒါပေမယ့် ကျွန်တော်သွားတာနောက်ကျသွားပြီး ဝူတပ်အနိုင်ရသွားရင် ဘယ်လိုလုပ်မလဲ"

"ရန်သူတွေက နိုင်သွားရင် ချန်တူးကိုမချီတက်လာရဲဘူး။ ဒါကြောင့် မြို့တော်က စိုးရိမ်စရာမရှိဘူး"

"ဘာကြောင့်လဲ"

"ဝေပြည်က သူတို့ကိုအနောက်မှာစောင့်နေတယ်။ ဧကရာဇ်က ပိုင်တိချန်မှာ ဝင်ခိုရလိမ့်မယ်။ ကျုပ် ငါးဗိုက်မူးချောင်းနားမှာ တပ်သားတစ်သောင်းကို တိတ်တဆိတ်ချထားပြီးပြီ"

"ဟုတ်လား? ကျွန်တော် အဲ့မူးချောင်းကနေသုံး၊လေးခါလောက်ဖြတ်လာတာ ဘာတပ်မှမတွေ့မိပါဘူး။ ခင်ဗျားလည်း ကျွန်တော့ကိုလိမ်ပြောပါ့မလား"

"မကြာခင်သိရမှာပါ။ မေးခွန်းတွေအများကြီးမမေးပါနဲ့"

ထို့နောက် "မာလျန့်"(Ma Liang) သည် တပ်စခန်းသို့ပြန်သွားပြီး "ကျူးကဲလျန့်"(Zhuge Liang) သည်လည်း စစ်ကူပို့ရန်အတွက် ပြင်ဆင်ခဲ့သည်။

ရှူတပ်သားတို့သည် ပျင်းရိလာကြပြီး လုံလောက်သောကာကွယ်မှုတို့ကိုမလုပ်ဆောင်တော့ပေ။ ထိုအခြင်းအရာကြောင့် "လုရွှင့်"(Lu Xun) သည် တိုက်ရန်အချိန်ကျပြီဟုယူဆကာ သူ၏စစ်သူကြီးတို့ကို ရွက်ဖျင်တဲသို့ခေါ်ပြီး အမိန့်များပေးခဲ့သည်။

"ကျုပ် သခင်ကြီးရဲ့အမိန့်ကြောင့် ဒီကိုလာပြီးကတည်းက ဘာတိုက်ခိုက်မှုမရှိခဲ့ဘူး။ ရန်သူရဲ့အချက်အလက်တွေကိုပဲ ယူပြီးစောင့်နေခဲ့တယ်။ အခုတောင်ဘက်ကမ်းနားက စခန်းကိုသိမ်းချင်တယ်၊ ဘယ်သူသွားမလဲ"

ထိုအခါ "ဟန်တန်"(Han Dang) ၊ "ကျိုးထိုက်"(Zhou Tai) နှင့် "လင်ထုံ"(Lin Tong) တို့တပြိုင်တည်းထွက်လာပြီး သွားလိုကြောင်းပြောသည်။ သို့သော် သေနာပတိက လက်မခံချေ။ ထို့နောက် အငယ်တန်းစစ်သူကြီး "ချွန်းယွီတန်း"(Chunyu Dan) ကိုခေါ်ကာ

"ခင်ဗျားက တောင်ဘက်ကစတုတ္ထမြောက်စခန်းကိုတိုက်ရမယ်။ အဲ့စခန်းခေါင်းဆောင်က ဖူထုံ(Fu Tong) ပဲ။ ခင်ဗျားကိုအကူအနေနဲ့ တပ်သားငါးထောင်ပေးလိုက်မယ်"

ထို့နောက် "ချွန်းယွီတန်း"(Chunyu Dan) လည်းထွက်သွားသည်။ ပြီးနောက် "ရွှီရှန်"(Xu Sheng) နှင့် "တင်းဖုန်း"(Ding Feng) တို့ကိုခေါ်ပြီး

"ခင်ဗျားတို့က တစ်ယောက်ကို တပ်သားသုံးထောင်စီနဲ့တပ်စခန်းက နှစ်မိုင်အကွာမှာစောင့်နေပါ။ ချွန်းယွီတန်း(Chunyu Dan) စစ်ရှုံးပြီး ရန်သူတွေလိုက်လာရင် ကူညီဖို့အတွက်ပေါ့"

"ချွန်းယွီတန်း"(Chunyu Dan) သည် ရန်သူ့၏တပ်စခန်းကို သုံးချက်တီးအချိန်ခန့်တွင်ရောက်ရှိပြီး ဗုံတို့ကိုတီးစေကာတိုက်ခိုက်လေသည်။ "ဖူထုံ"(Fu Tong) သည် လှံကိုကိုင်ကာ ထွက်လာပြီး တဖက်ခေါင်းဆောင်ကိုတိုက်သဖြင့် ဝူစစ်သူကြီးမှာထွက်ပြေးရသည်။ ထို့အပြင် နောက်ထပ်ဗုံသံတို့ကိုကြားလိုက်ရပြီး "ကျောက်ရုံ"(Zhao Rong) ၏စစ်တပ်မှ လမ်းပိတ်ထားသည်။ ထိုအခါ "ချွန်းယွီ"(Chunyu Dan) သည် တခြားလမ်းမှထွက်ပြေးခဲ့ရပြီး တပ်သားများစွာဆုံးရှုံးခဲ့သည်။ သို့သော်လည်း မကြာခင်တွင် မန်မျိုးနွယ်စုခေါင်းဆောင် "ရှားမိုခဲ့"(Sha Moke) နှင့်တွေ့လေသည်။ "ချွန်းယွီတန်း"(Chunyu Dan) သည်လည်း ထိပ်တိုက်မရင်ဆိုင်ပဲထွက်ပြေးလေရာ တပ်သုံးတပ်တို့၏လိုက်တိုက်ခိုက်ခြင်းကိုခံရသည်။ တပ်စခန်းမှ နှစ်မိုင်အကွာခန့်သို့ရောက်သောအခါတွင် အသင့်စောင့်နေသော "ရွှီရှန်"(Xu Sheng) နှင့် "တင်းဖုန်း"(Ding Feng) တို့ထွက်လာပြီး ရန်သူ့တပ်ကိုတားဆီးကာ "ချွန်းယွီတန်း"(Chunyu Dan) ကိုစခန်းသို့ပြန်ခေါ်လာသည်။ မြားစိုက်နေသည်ကိုပင် မဖယ်ရှားနိုင်သေးသော "ချွန်းယွီတန်း"(Chuyu Dan) သည် "လုရွှင့်"(Lu Xun) နှင့်တွေ့ကာ သူ့ဆုံးရှုံးမှုနှင့်ပတ်သတ်ပြီး တောင်းပန်လေသည်။

"ဒါခင်ဗျားအပြစ်မဟုတ်ပါဘူး။ ကျုပ်က ရန်သူတွေကိုစမ်းသပ်ချင်လို့ဒီလိုလုပ်ခိုင်းတာပါ။ ကျုပ်အစီအစဉ်က အဆင်သင့်ဖြစ်ပြီ"

"တင်းဖုန်း"(Ding Feng) နှင့် "ရွှီရှန်"(Xu Sheng) မှ

"ရန်သူတွေက အင်အားတောင့်တင်းပြီး အလွယ်တကူအနိုင်ယူနိုင်မှာမဟုတ်ဘူး။ ကျွန်တော်တို့လည်း အဆုံးအရှုံးတွေတအားများလိမ့်မယ်"

"ကျုပ်အကြံက ကျူးကဲလျန့်(Zhuge Liang) ကိုလှည့်စားလို့ရမှာမဟုတ်ဘူး။ တော်သေးတာက သူမရှိဘူးဆိုတော့ ကျုပ်က အောင်မြင်မှုရနိုင်မယ်"

ထို့ကြောင့် အမှုထမ်းတို့ကိုခေါ်ပြီး အမိန့်ပေးခဲ့သည်။

"ကျူရန်(Zhu Ren) က ရေတပ်ကိုဦးဆောင်ရမယ်။ သူက အရှေ့တောင်လေတိုက်တဲ့အခါ မနက်ဖြန်နေ့လည်မှာ ထွက်ရမယ်။ ဒါ့အပြင် သင်္ဘောပေါ်မှာ ကျူပင်၊ ကောက်ရိုးတွေတင်ဆောင်သွားပြီးတော့ အမိန့်ပေးတဲ့အချိန်မှာသုံးရမယ်။ ဟန်တန်(Han Dang) က မြစ်ရဲ့မြောက်ဘက်ကိုတိုက်ခိုက်ပြီး ကျိုးထိုက်(Zhou Tai) က တောင်ဘက်ကိုတိုက်ရမယ်။ တပ်သားတစ်ယောက်စီက လက်နက်တွေအပြင် ကောက်ရိုးတွေသယ်ပြီး အဲ့ထဲမှာ ဆာလဖာနဲ့ယမ်းစိမ်းတွေအပြင် မီးခတ်ပါဖွက်ထားရမယ်။ သူတို့တွေက ချီတက်ပြီး ရှူတပ်စခန်းနားရောက်ရင် မီးရှို့ရမှာဖြစ်တယ်။ ဒါပေမယ့် သူတို့တွေက စခန်းပေါင်းနှစ်ဆယ်ကိုပဲရှို့ပြီး ကျန်တာကိုချန်ထားရမယ်။ ပြီးတော့ ရန်သူကိုလိုက်လံတိုက်ပြီး လျူဘေ့(Liu Bei) ကိုဖမ်းနိုင်သည်အထိတိုက်ရမယ်"

ခေါင်းဆောင်တို့လည်း အမိန့်ရပြီးနောက် ထွက်သွားကြသည်။

ပထမဧကရာဇ်သည် သူ၏တပ်စခန်းတွင်နေကာ ဝူတို့ကိုချေမှုန်းရန်ကြံစည်နေသည်။ ထိုအချိန်တွင် လေတိုက်ခတ်ခြင်းမရှိသော်လည်း ရုတ်တရတ် တိုင်တစ်တိုင်ကလဲပြိုကျသွားသည်။ ထို့နောက် "ချန်ကျင်း"(Cheng Jin) ကိုမေးသည်။

"ဒါက ဒီညမှာ ဝူတပ်တွေလာတိုက်မယ်ဆိုတဲ့နိမိတ်ပဲဖြစ်ပါတယ်"

"မနေ့က စစ်ရှုံးပြီးပြီဆိုတော့ သူတို့တွေထပ်မလာလောက်ပါဘူး"

"ဒါပေမယ့် မနေ့ကဟာက ထောက်လှမ်းတာသက်သက်ဆိုရင်ကော?"

ထိုအချိန်တွင် ဝူတပ်အချို့သည် အရှေ့ဘက်တောင်ကုန်းများတလျှောက်ချီတက်သွားသည်ဟူသော သတင်းကိုကြားရသည်။ ဧကရာဇ်မှ

"ဒီတပ်သားတွေက ကျုပ်တို့တွေအာရုံလွဲမှားအောင်လုပ်နေတာပဲ။ စစ်သူကြီးတွေကို မလှုပ်ရှားဖို့အမိန့်ပေးလိုက်ပါ။ ဒါပေမယ့် ကွမ်းရှင်း(Guan Xing) နဲ့ ကျန်းပေါက်(Zhang Bao) ကိုလွှတ်ပြီး အခြေအနေစုံစမ်းကြည့်ပါစေ"

နေဝင်ရီတရောအချိန်တွင် ပြန်လာပြီး သတင်းပို့သည်။

"မြောက်ဘက်ကမ်းမှာ မီးတွေလောင်နေတာလှမ်းမြင်ရတယ်"

ထိုအခါ ဧကရာဇ်သည် အလောတကြီးဖြင့် "ကွမ်းရှင်း"(Guan Xing) ကို မြောက်ဘက်စခန်းသို့ကူညီရန်သွားစေသည်။ "ကျန်းပေါက်"(Zhang Bao) ကိုမူအခြေအနေကြည့်ရန် တောင်ဘက်သို့လွှတ်လိုက်သည်။

တစ်ချက်တီးခွဲခန့်တွင် အရှေ့ဘက်မှလေတိုက်ကာ ဧကရာဇ်၏ဘယ်ဘက်တပ်စခန်းသည် ရုတ်တရတ်မီးစွဲလောင်သည်။ ထို့ကြောင့် ထိုတပ်စခန်းကိုမီးငြိမ်းရန်ပြုစဉ် ညာဘက်စခန်းပါ မီးလောင်ကျွမ်းခဲ့သည်။ လေတို့၏အကူဖြင့် မီးမှာအပြင်းအထန်လောင်ကျွမ်းပြီး သစ်ပင်တို့ကိုပါ ကူးစက်သွားသည်။ ထို့နောက် အရှုပ်အထွေးဖြစ်သွားပြီး ထိုတပ်စခန်းတို့မှ တပ်ထားတို့သည် မီးဘေးမှလွတ်မြောက်ရန် ဧကရာဇ်၏တပ်စခန်းသို့ပြေးလာကြသည်။ အချင်းချင်းတက်နင်းမိကြလေရာ လူပေါင်းများစွာသေဆုံးခဲ့သည်။ ထို့အပြင် အနောက်ဘက်မှ ဝူတပ်ကြီးသည် တဖက်ရန်သူတို့ကို သတ်ဖြတ်လေသည်။

ဧကရာဇ်သည် မြင်းပေါ်တက်ကာ "ဖုန်းရှီ"(Feng Xi) ၏စခန်းသို့သွားလေရာ ထိုစခန်းသည်လည်း မီးစွဲနေသည်ကိုတွေ့လေသည်။ "ဖုန်းရှီ"(Feng Xi) သည် မြင်းပေါ်တက်ပြီး ထွက်ပြေးလေသည်။ သို့သော် ဝူတပ်ခေါင်းဆောင် "ရွှီရှန်"(Xu Sheng) နှင့်ရင်ဆိုင်ရကာ "ဖုန်းရှီ"(Feng Xi) က နေရစ်ကာ ရန်သူနှင့်တိုက်ပြီး ဧကရာဇ်သည် အနောက်ဘက်ကိုသွားသည်။ သို့သော် "ရွှီရှန်"(Xu Sheng) က တိုက်လက်စရန်သူကိုမတိုက်ပဲ ဧကရာဇ်နောက်ကိုလိုက်သည်။ ထိုအချိန်တွင် အရှေ့ဘက်မှ "တင်းဖုန်း"(Ding Feng) ၏တပ်ရောက်လာရာ ဧကရာဇ်သည် ရန်သူ့ကြားထဲရောက်သွားသဖြင့် ထိတ်လန့်သွားသည်။

သို့သော် ထိုအချိန်တွင် တပ်တစ်တပ်ရောက်လာပြီး ဧကရာဇ်ကိုအန္တရာယ်ကြားမှကယ်တင်သွားခဲ့သည်။ ထိုတပ်မှာ "ကျန်းပေါက်"(Zhang Bao) ဦးဆောင်သော နန်းစောင့်တပ်ဖြစ်သည်။ ထိုသို့တပ်ဆုတ်နေကြစဉ် ရှူစစ်သူကြီး "ဖူထုံ"(Fu Tong) ၏တပ်နှင့်တွေ့ရာ အတူတကွသွားကြလေသည်။ ဝူတပ်တို့သည်လည်း အနောက်မှလိုက်လာသည်၊ ထွက်ပြေးသောတပ်သည် ကုန်းနှီးတောင်သို့ရောက်လာသည်။ စစ်သူကြီးနှစ်ဦးဖြစ်သော "ကျန်းပေါက်"(Zhang Bao) နှင့် "ဖူထုံ"(Fu Tong) တို့သည် ဧကရာဇ်ကိုတောင်ကုန်းပေါ်သို့တက်စေပြီး ရှောင်တိမ်းစေသည်။ "လုရွှင့်"(Lu Xun) သည် တောင်ကုန်းကိုဝန်းရံထားရန် အမိန့်ပေးလိုက်သည်။ "ကျန်းပေါက်"(Zhang Bao) နှင့် "ဖူထုံ"(Fu Tong) တို့သည် လမ်းကိုပိတ်ထားပြီး ရန်သူတို့ကိုတောင်ပေါ်သို့တက်ခွင့်မပေးပေ။

ဧကရာဇ်သည် တောင်ကုန်းမှနေ၍ မီးတို့တဟုန်းဟုန်းတောက်လောင်နေသည်ကိုလှမ်းမြင်ရပြီး ရှူတပ်သားတို့၏အလောင်းသည် မြစ်ပေါ်တွင် ပေါလောပေါ်နေသည်ကိုတွေ့ခဲ့သည်။

နောက်ရက်တွင် ဝူတပ်က တောင်ကိုမီးရှို့ရာ ဧကရာဇ်၏အစောင့်တပ်တို့သည် ကြွက်စုတ်ကဲ့သို့ထွက်ပြေးခဲ့ရပြီး ဧကရာဇ်မှာ စိုးရိမ်နေခဲ့သည်။ ထိုအချိန်တွင် စစ်သူကြီးတစ်ဦးသည် မြင်းသည်တော်တစ်ဒါဇင်ခန့်နှင့်အတူ တောင်ကုန်းပေါ်သို့တက်လာသည်။ ထိုသူမှာ "ကွမ်းရှင်း"(Guan Xing) ဖြစ်သည်။ "ကွမ်းရှင်"(Guan Xing) သည် မြင်းပေါ်မှဆင်းပြီး အရိုအသေပြုကာ

"အရှင်မင်းကြီး၊ နေရာတိုင်းမှာ မီးတွေလောင်နေပြီ။ ဒီနေရာကမလုံခြုံတော့ဘူး။ ဒါကြောင့် ပိုင်တိချန်ကိုတပ်ဆုတ်ပြီး တပ်တွေကိုပြန်စုစည်းသင့်ပါတယ်"

"ဘယ်သူနေရစ်ခဲ့ပြီး ရန်သူတွေကိုဟန့်တားမလဲ"

"ဖူထုံ"(Fu Tong) မှ

"ကျွန်တော် အသက်ဆုံးသည်ထိရန်သူတွေကိုတိုက်ပြီး အနောက်ဘက်ကိုကာကွယ်ပါ့မယ်"

ညနေစောင်းတွင် "ကွမ်းရှင်း"(Guan Xing) သည် ရှေ့မှဦးဆောင်ပြီး "ကျန်းပေါက်"(Zhang Bao) က ဧကရာဇ်ကိုကာကွယ်လျက် "ဖူထုံ"(Fu Tong) သည် နောက်ကျောကိုစောင့်ကြည့်ကာ ထွက်ခွာကြသည်။ သူတို့၏သခင်ကို တောင်ကုန်းမှအဝေးသို့လုံခြုံစွာဆုတ်ခွာစေနိုင်ခဲ့သည်။ ဝူတပ်တို့သည် ရန်သူတို့၏လှုပ်ရှားမှုကိုသတိပြုမိသောအခါ ဧကရာဇ်ကိုဖမ်းနိုင်လျှင်ရရှိမည့်ဆုလာဘ်ကြီးကိုမက်မောပြီး ရန်သူ့နောက်ကို အသည်းအထန်လိုက်ခဲ့သည်။ ဧကရာဇ်သည် တပ်သားတို့၏အဝတ်ကိုချွတ်ကာ မီးရှို့စေပြီး ရန်သူ့တပ်ကိုအဟန့်အတားဖြစ်အောင် လုပ်စေခဲ့သည်။ "ကျူရန်"(Zhu Ran) သည် မြစ်ထဲမှတက်လာပြီး ဗုံတို့ကိုကျယ်လောင်စွာတီးပြီးနောက် ထွက်ပြေးသော ဧကရာဇ်ကိုတားဆီးရန်ပြုသည်။

ဧကရာဇ်သည် လွတ်လမ်းမရှိတော့ပြီဟုထင်ခဲ့လေသည်။

"ဒါနိဂုံးပဲလား"

ဧကရာဇ်၏တူတော်နှစ်ဦးတို့သည် ရန်သူတို့ကိုထိုးဖောက်ပြီး ထွက်ရန်ပြုသော်လည်း မထိုးဖောက်နိုင်ခဲ့ပဲ ဒဏ်ရာတို့နှင့်ပြန်ရောက်လာသည်။ အရုဏ်တက်ချိန်နားသို့ရောက်သောအခါ ရှူတပ်မှာ အခြေအနေဆိုးရွားလာခဲ့သည်။ ထိုအချိန်တွင် "ကျူရန်"(Zhu Ren) ၏တပ်ကိုထိုးဖောက်ပြီး ကူညီရန်ရောက်လာသော ကြောက်မက်ဖွယ်ကောင်းသည့်စစ်သူကြီးရောက်လာသည်။

ဧကရာဇ်သည် အသက်ဘေးမှ လွတ်မြောက်သွားခဲ့ပြန်သည်။ လာရောက်ကယ်တင်သူမှာ "ကျောက်ယွင်"(Zhao Yun) ဖြစ်ပြီး သူသည် ကျန်းကျိုးတွင်ရှိနေခဲ့ကာ သူ့သခင်၏သတင်းတို့ကြားရသောကြောင့် ရောက်လာခြင်းဖြစ်သည်။ ထိုသို့ရောက်လာချိန်တွင် မီးတို့လောင်နေသောအရပ်ဆီသို့လာခဲ့ပြီး ဧကရာဇ်အသက်ဘေးနှင့်ကြုံနေသောအချိန်တွင် ဝင်ရောက်ကယ်တင်နိုင်ခဲ့သည်။

"ကျောက်ယွင်"(Zhao Yun) ထွက်လာသည်ကို ကြားသည်နှင့် "လုရွှင့်"(Lu Xun) သည် သူ၏တပ်သားတို့ကို တပ်ဆုတ်စေခဲ့သည်။ "ကျောက်ယွင်"(Zhao Yun) သည် "ကျူရန်"(Zhu Ran) နှင့်ရင်ဆိုင်ပြီး ပထမအချက်တွင်ပင် "ကျူရန်"(Zhu Ran) ကိုသတ်နိုင်ခဲ့သည်။ သို့နှင့် ဝူတပ်ကြီးလည်း ဆုတ်ခွာသွားသည်။ ဧကရာဇ်သည် ဘေးကင်းစွာဖြင့် ပိုင်တိချန်သို့ရောက်သွားခဲ့သည်။ သို့သော် လမ်းခုလတ်တွင် သူ၏လက်အောက်ငယ်သားတို့ဒုက္ခရောက်ကုန်လိမ့်မည်ဟုတွေးတောကာ မေးမြန်းလေသည်။

"ကျုပ်ကတော့ လုံခြုံပါပြီ။ ဒါပေမယ့် စစ်သူကြီးတွေနဲ့ရဲမက်တွေကရော?"

"ရန်သူတွေက ကျွန်တော်တို့နဲ့တအားနီးကပ်လာပါပြီ။ ဒါကြောင့် ဘာမှမစောင့်တော့ပဲ ဧကရာဇ်က မြို့ထဲမှာ အရင်သွားပြီး အနားယူသင့်ပါတယ်။ ကျွန်တော်တို့က ကယ်နိုင်မယ့်ခေါင်းဆောင်တွေကိုသွားကယ်ပါ့မယ်"

ဧကရာဇ်သည် ပိုင်တိချန်သို့ရောက်ချိန်တွင် နောက်လိုက်နောက်ပါတို့မှာ အယောက်တစ်ရာခန့်သာကျန်တော့သည်။

ထိုအချိန်တွင် ကျန်ရစ်ခဲ့သော "ဖူထုံ"(Fu Tong) သည် အရပ်ရှစ်မျက်နှာမှရန်သူတို့၏ဝန်းရံမှုကိုခံခဲ့ရသည်။ "တင်းဖုန်း"(Ding Feng) က အော်ဟစ်ခဲ့သည်။

"ရှူတပ်သားတွေအများကြီးသေဆုံးကုန်ပြီ။ အဲ့ထက်များတဲ့ပမာဏက လက်နက်ချသွားခဲ့ပြီ။ ခင်ဗျားသခင်ကိုလည်း ကျုပ်တို့ကဖမ်းနိုင်လိုက်ပြီဆိုတော့ ခင်ဗျားလည်း လက်နက်ချရင်အကောင်းဆုံးပဲ။ ခင်ဗျားရဲ့တပ်တွေနဲ့ကျုပ်တို့ကို ဘာမှမလုပ်နိုင်ဘူး"

"ဟန်ပြည်ရဲ့အမှုထမ်းက ဝူလက်အောက်ခံလုပ်မယ်လို့ထင်လား"

ထို့ကြောင့် ရဲရင့်စွာဖြင့် ရန်သူတို့ကိုတိုက်ခိုက်ခဲ့လေသည်။ သို့သော် သူ၏သူရသတ္တိနှင့်ခွန်အားတို့မှာ ရန်သူ့တပ်ကိုထိုးဖောက်ခြင်းငှာ မတတ်နိုင်ခဲ့ပေ။ ထို့ကြောင့် တိုက်ပွဲတွင် ကျသွားခဲ့လေသည်။

ဝန်ကြီး "ချန်ကျီ"(Cheng Ji) သည် တိုက်ပွဲအခြေအနေကိုသိကာ မြစ်ကမ်းဘက်သို့သွားပြီး ရေတပ်တို့ကိုကမ်းပေါ်တက်ကာတိုက်ရန် အမိန့်ပေးခဲ့သည်။ သို့သော်လည်း ထိုတပ်သည် ပြိုကွဲသွားခဲ့သည်။ "ချန်ကျီ"(Cheng Ji) ၏စစ်သူကြီးတစ်ဦးမှ

"ဝူတပ်တွေအများကြီးရောက်လာပြီ။ ကျွန်တော်တို့ထွက်ပြေးဖို့လမ်းရှာကြရအောင်"

"ကျုပ်သခင်နောက်ကိုလိုက်ခဲ့တဲ့အချိန်ကတည်းက ဘယ်တော့မှရန်သူကိုကျောမပေးခဲ့ဖူးဘူး"

"ချန်ကျီ"(Cheng Ji) သည် ရန်သူတို့ဝိုင်းလာသဖြင့် သူ့ဓားကိုယူကာ ကိုယ့်ကိုယ်ကိုသတ်သေခဲ့လေသည်။

"ဝူပန်"(Wu Ban) နှင့် "ကျန်းနန်"(Zhang Nan) တို့သည် ယီလင်ကိုဝန်းရံနေခဲ့ရာမှ "ဖုန်းရှီ"(Feng Xi) ရောက်လာပြီး ဧကရာဇ်၏အခြေအနေကိုပြောသဖြင့် ကယ်တင်ရန် ပြန်ဆုတ်ခွာသွားကြသည်။ ထို့ကြောင့် "လုရွှင့်"(Lu Xun) ခန့်မှန်းထားသည့်အတိုင်းပင် "စွန်းဟွမ်"(Sun Huan) မှာ လွတ်မြောက်သွားသည်။

"စွန်းဟွမ်"(Sun Huan) သည် ထွက်လာသည်နှင့် "ဖုန်းရှီ"(Feng Xi) နှင့် "ကျန်းနန်"(Zhang Nan) တို့ကိုလိုက်တိုက်လေသည်။ ရှူစစ်သူကြီးနှစ်ဦးတို့သည် ဝူတပ်တို့၏တိုက်ခိုက်မှုကို အရှေ့ရောအနောက်မှပါ ခံရသောကြောင့် သေဆုံးသွားခဲ့သည်။ "ဝူပန်"(Wu Ban) သည် ရန်သူတို့၏တပ်မှ ထွက်ပြေးလွတ်မြောက်ခဲ့သည်။ ဝူတပ်မှ အနောက်မှလိုက်သော်လည်း လမ်းတစ်ဝက်တွင် "ကျောက်ယွင်"(Zhao Yun) နှင့်တွေ့သောကြောင့် လုံခြုံစွာဖြင့် ပိုင်တိချန်သို့ ရောက်ခဲ့လေသည်။ မန်မျိုးနွယ်စုဘုရင် "ရှားမိုခဲ့"(Sha Moke) သည်လည်း ထွက်ပြေးရာမှ လမ်းတွင် "ကျိုးထိုက်"(Zhou Tai) နှင့်တွေ့ကာ အသတ်ခံခဲ့ရသည်။ ရှူစစ်သူကြီးနှစ်ဦးဖြစ်သော "တုလု"(Du Lu) နှင့် "လျူနင်"(Liu Ning) တို့ကလက်နက်ချခဲ့ပြီး ရဲမက်တို့သည်လည်း လက်နက်ချခဲ့သည်။ ရှူတပ်ရှိလက်နက်၊ စားနပ်ရိက္ခာအားလုံးတို့ကို သိမ်းယူခြင်းခံခဲ့ရသည်။

ရှူပြည်၏ရှုံးနိမ့်မှုသည် တောင်ပိုင်းပြည်နယ်သို့ရောက်ပြီးနောက် ဧကရာဇ်သည်တိုက်ပွဲတွင်သေဆုံးခဲ့သည်ဟူသော သတင်းများလည်းရောက်လာခဲ့သည်။ ထို့ကြောင့် စွန်းအမျိုးသမီးသည် ဝမ်းနည်းပြီး မြစ်ထဲသို့သွားကာ အနောက်ဘက်သို့ကြည့်ပြီး ငိုခဲ့သည်။ ထို့နောက် မြစ်ထဲသို့ခုန်ချကာ သတ်သေခဲ့သည်။ နောက်ပိုင်းတွင် ထိုကမ်းစပ်နား၌ ကျောင်းဆောင်တစ်ခုဆောက်ခဲ့ပြီး 'ရဲရင့်သော မိန်းမလှ၏ကျောင်းဆောင်' ဟုခေါ်တွင်စေသည်။

"လုရွှင့်"(Lu Xun) ၏အောင်နိုင်မှုသည် သူ့ကိုနာမည်ကြီးစေခဲ့သည်။ ထို့ကြောင့် ရန်သူတို့ကိုတိုက်ခိုက်ရန် တပ်တို့ကိုဦးဆောင်ပြီး အနောက်ဘက်သို့ချီတက်ခဲ့သည်။ သို့သော် ခွေ့ခံတပ်နားသို့ရောက်သောအခါ မြင်းကိုတန့်လိုက်ပြီး အရှေ့ဘက်တွင်ရှိသောတောင်ကုန်းမှ သေခြင်းအငွေ့အသက်တို့ကိုခံစားရလေသည်။

"ရှေ့မဆက်နဲ့တော့။ အဲ့မှာ ကင်းပုန်းတွေရှိနိုင်တယ်"

ထို့ကြောင့် သုံးမိုင်အကွာသို့ဆုတ်ခွာပြီး ကျယ်ပြန့်သောကွင်းပြင်တွင် စခန်းချသည်။ ထို့နောက် ရန်သူတို့ရုတ်တရတ်တိုက်လာလျှင် ခုခံနိုင်ရန်ပြင်ဆင်ထားစေသည်။ ကင်းထောက်တို့ကိုလွှတ်ပြီး အခြေအနေကိုစုံစမ်းစေရာ ရန်သူတို့ကိုမတွေ့ကြောင်းပြောသည်။ "လုရွှင့်"(Lu Xun) က သံသယဝင်ကာ ကုန်းမြင့်တစ်ခုပေါ်မှတက်ကြည့်သည်။ ထိုအငွေ့အသက်ကိုခံစားရနေသဖြင့် နောက်ထပ်လူလွှတ်ကာ ကြည့်ခိုင်းပြန်သည်။ သို့သော် ခွေးတစ်ကောင်၊ ကြောင်တစ်မြီးမှမတွေ့ခဲ့ပေ။

နေမင်းကြီးသည် အနောက်ဘက်သို့ချဉ်းကပ်သွားကာ ပျောက်ကွယ်လုဖြစ်သွားသည်။ "လုရွှင့်"(Lu Xun) သည် မကျေနပ်ပဲ သူ့လူယုံကိုလွှတ်ကာ ထပ်ကြည့်စေသည်။

"စစ်သားတွေတစ်ယောက်မှမတွေ့ဘူး။ ဒါပေမယ့် မြစ်ကမ်းနားမှာ ကျောက်တုံးကြီးတွေအခုတစ်ရာလောက်ရှိတယ်"

သေနာပတိသည် သံသယရှိနေခဲ့ပြီး ဒေသခံတို့ကိုခေါ်ကာ မေးမြန်းခဲ့သည်။

"ဒီကျောက်တုံးတွေကို ဘယ်သူထား,ထားတာလဲ? ဘာလို့ဒီလောက်ကြောက်စရာကောင်းရတာလဲ"

"ကျွန်တော်တို့သေချာမသိပါဘူး။ ဒီနေရာက ငါးဗိုက်မူးချောင်းလို့ခေါ်ပါတယ်။ ကျူးကဲလျန့်(Zhuge Liang) က အနောက်ဘက်မြစ်ပြည်နယ်ကိုသွားတုန်းက တပ်သားတွေအများကြီးကို သဲထူတဲ့ရေမော်တွေပေါ်မှာ ကျောက်တုံးတွေထားစေခဲ့တယ်။ တခါတလေကျရင် အဲ့ကျောက်တုံးတွေထဲက ရေငွေ့တွေထွက်နေတာ တွေ့ရတယ်"

"လုရွှင့်"(Lu Xun) သည် သူကိုယ်တိုင်သွားကြည့်ရန်ဆုံးဖြတ်လိုက်ပြီး ကိုယ်ရံတော်အနည်းငယ်နှင့်အတူသွားလေသည်။ ထိုကျောက်တုံးတို့ကို ကွန်ပါ၏ရှစ်မျက်နှာညွှန်ပြသကဲ့သို့စီစဉ်ထားပြီး တံခါးများ၊ တံခါးခုံများ၊ တံခါးထုပ်များရှိသည်။

"ဒါက လူကိုခြောက်လန့်ဖို့လုပ်ထားတဲ့အရာပဲထင်တယ်။ ဘယ်လိုများအသုံးဝင်လည်းမပြောတတ်ဘူး"

ထို့နောက် ထိုထူးခြားသောအပြင်အဆင်ကို လေ့လာရန်အတွက် ကျောက်တုံးများကြားသို့ဝင်သွားသည်။ ပါလာသောလူများအနက်မှ တစ်ဦးမှပြောသည်။

"နေဝင်လာပြီဆိုတော့ ကျွန်တော်တို့စခန်းကိုပြန်သင့်ပြီ"

 "လုရွှင့်"(Lu Xun) သည် ထွက်ပေါက်ကိုရှာသောအခါ ရုတ်တရတ် မိုးသက်မုန်တိုင်းကျလာပြီး ဖုန်တို့လွင့်ပျံလာကာ ကောင်းကင်နှင့်မြေကြီးကိုလွှမ်းမိုးထားသည်။ ထို့အပြင် ကျောက်တုံးတို့သည် တောင်များနှင့်အသွင်တူကာ အလိုအလျောက်ရွှေ့လျားပြီး ဓားကဲ့သို့မားမားမတ်မတ်ရှိနေသည်။ ဖုန်နှင့်သဲမှုန်တို့သည် လှိုင်းလုံးများပမာ၊ တောင်ပူစာပမာ တစ်ခုကအရှေ့၊ ကျန်တစ်ခုက အနောက်တွင်ရှိနေခဲ့သည်။ မြစ်ရေဆူပွက်သောအသံသည် တိုက်ပွဲမစခင်တီးသောဗုံသံကဲ့သို့မြည်ဟီးနေသည်။

"လုရွှင့်"(Lu Xun) သည် ကြောက်ရွံ့ကာ

"ဒါ ကျူးကဲလျန့်(Zhuge Liang) ရဲ့လှည့်ကွက်ပဲ။ သူ့ထောင်ချောက်ထဲမိသွားပြီ"

ပြီးနောက် ထွက်ပြေးရန်ကြိုးစားသော်လည်း ထွက်ပေါက်ကိုရှာမတွေ့ပေ။ သို့နှင့် မည်သို့လုပ်ရမည်ကို ကြံစည်နေချိန်တွင် အဘိုးအိုတစ်ဦးပေါ်လာကာ

"စစ်သူကြီးက အပြင်ထွက်ချင်လို့လား"

"အဘိုးက ကျွန်တော့ကို လမ်းညွှန်ပေးမယ်ဆိုရင် ကျေးဇူးတင်မိမှာပါ"

အဘိုးအိုသည် တောင်ဝှေး၏အကူအညီကိုယူကာ လျှောက်လှမ်းပြီး "လုရွှင့်"(Lu Xun) အား အပြင်သို့ပို့ပေးခဲ့သည်။ အဘိုးအိုသည် လမ်းခုလတ်တွင် လမ်းပျောက်ခြင်းမရှိသလိုရပ်တန့်ခဲ့ခြင်းလည်းမရှိပေ။ တောင်ကုန်းမြင့်ပေါ်သို့ပြန်ရောက်သွားသောအခါ "လုရွှင့်"(Lu Xun) မှ ထိုအဘိုးအိုက မည်သူဖြစ်သည်ကိုမေးမြန်းသည်။

"ကျုပ်က ကျူးကဲလျန့်(Zhuge Liang) ရဲ့ယောက္ခမပါ၊ ဟွမ်ချန်ရန်(Huang Chenyan) လို့ခေါ်ပါတယ်။ ကျုပ်သမက်က မင်းမြင်တဲ့အတိုင်း ဒီကျောက်တုံးတွေကို ဒီလိုထားခဲ့တယ်။ သူပြောပုံအရကတော့ ရှစ်ထောင့်ခင်းကျင်းမှုဝင်္ကပါဖြစ်ပြီး တံခါးရှစ်ခုရှိတယ်။ အဲ့တံခါးတွေရဲ့နာမည်တွေက အနားယူခြင်းတံခါးပေါက်၊ ရှင်သန်ခြင်းတံခါးပေါက်၊ ထိခိုက်ဒဏ်ရာရခြင်းတံခါးပေါက်၊ အတာအဆီးတံခါးပေါက်၊ မျှော်လင့်ချက်တံခါးပေါက်၊ သေခြင်းတံခါးပေါက်၊ အံ့ဩခြင်းတံခါးပေါက်နဲ့အခွင့်အလမ်းတံခါးပေါက်တို့ဖြစ်တယ်။ သူတို့တွေက မရေမတွက်နိုင်တဲ့ပြောင်းလဲမှုတွေလုပ်ဆောင်နိုင်ပြီး စစ်တပ်အင်အားတစ်သိန်းနဲ့ညီမျှတယ်။ သူထွက်သွားတဲ့အချိန်တုန်းက ဝူပြည်ခေါင်းဆောင် ဒီထဲမှာပိတ်မိနေခဲ့ရင် မဖွင့်ပေးဖို့ ကျုပ်ကိုမှာခဲ့တယ်။ စစ်သူကြီးကိုမြင်တော့ ဒီအကြောင်းကိုမသိတာမို့ ပိတ်မိနေလိမ့်မယ်ဆိုတာ သိခဲ့တယ်။ ဒါပေမယ့် ကျုပ်က စိတ်ကောင်းရှိသူဆိုတော့ မင်းထွက်ပေါက်မရှိပဲ ပိတ်မိနေမှာကို မကြည့်ရက်ဘူး။ ဒါကြောင့် ရှင်သန်ခြင်းတံခါးပေါက်ကနေ လမ်းပြပေးခဲ့တာဖြစ်တယ်"

"အဘိုးက ဒါနဲ့ပတ်သတ်ပြီး လေ့လာထားသလား"

"ပြောင်းလဲမှုတွေက မရေမတွက်နိုင်လို့ အကုန်လုံးကိုမလေ့လာနိုင်ဘူး"

"လုရွှင့်"(Lu Xun) သည် မြင်းပေါ်မှဆင်းပြီး အဘိုးအိုကို အရိုအသေပြုကာ ထွက်သွားလေသည်။ ပြီးနောက် သူ၏စခန်းဆီသို့ကြည့်ကာ နက်နဲစွာတွေးပြီးနောက် ကောက်ချက်ချသည်။

"ဒီကျူးကဲလျန့်(Zhuge Liang) ကို အိပ်ပျော်နေတဲ့နဂါးလို့ခေါ်ကြတာ တကယ်မှန်တယ်။ ကျုပ်က သူ့ပြိုင်ဘက်မဟုတ်ဘူး"

ထို့နောက် တပ်ပြန်ဆုတ်ရန်အမိန့်ပေးလိုက်သဖြင့် အားလုံးက အံ့ဩသွားကြသည်။ စစ်သူကြီးတချို့က စစ်အောင်နေသဖြင့် ဆက်တိုက်ရန်အကြံပေးကြသည်။

"စစ်သူကြီးက ရန်သူတွေကို ဖြိုခွင်းပြီးပြီ။ လျူဘေ့(Liu Bei) က မြို့ငယ်လေးမှာ ပိတ်မိနေပြီ။ ဒီအချိန်က ရန်သူတွေကို ရှင်းလင်းရမယ့်အချိန်ပဲ။ ဒီကျောက်တုံးတွေကြောင့်နဲ့ တပ်မဆုတ်သင့်ဘူး"

"ကျုပ်က ကျောက်တုံးတွေက တပ်ဆုတ်တာမဟုတ်ဘူး။ ချောင်ဖီ(Cao Pi) ကြောင့် တပ်ဆုတ်တာဖြစ်တယ်။ သူ့ကြံရည်ဖန်ရည်က သူ့အဖေထက်မလျှော့ဘူး။ ကျုပ်သာ ရှူပြည်ကိုချီတက်သွားရင် သူကဝူကိုဝင်တိုက်မှာပဲ။ ဒါဆို ဘယ်လိုပြန်နိုင်တော့မလဲ"

သို့နှင့် တောင်ပိုင်းပြည်နယ်သို့ပြန်ခဲ့ကြသည်။ ဒုတိယရက်တွင် ကင်းထောက်တို့မှ သတင်းပို့လာသည်။

"ဝေပြည်ရဲ့တပ်ဖွဲ့သုံးဖွဲ့က ဝူပြည်နယ်စပ်အနားကိုချဉ်းကပ်လာတယ်။ ရုရွှီမှာ ချောင်ရန်(Cao Ren) ၊ တုန်းခိုမှာ ချောင်ရှို့(Cao Xiu)၊ နန်ကျွင်းမှာ ချောင်ကျန်း(Cao Zhen) တို့တပ်စွဲထားတယ်။ သူတို့ရည်ရွယ်ချက်ကဘာလည်းဆိုတာ သေချာမသိဘူး"

"ကျုပ်ထင်တဲ့အတိုင်းပဲ။ ဒါပေမယ့် သူတို့အတွက် အဆင်သင့်ဖြစ်နေပြီ"